طبعاً يا الربع هالاوصاف في طريقها للانقراض الا من رحم ربي
أنا يعجبني الرجل الاصيل الشهم عالي الشان
عزيز النفس كسب الطيب عاده ما يخليها
واحب اللي بوقت اللازمه يصهل صهيل حصان
وتعجبني رياجيلٍ بعيداتٍ هقاويها
واحب اللي ليا منه علا في جوه الدخان
يوردها حياض الموت روحه ما يداريها
الا منه قعد سلطان والا منه ركب شيطان
قوي الباس عرب الساس خيله ما يعفيها
واحب اللي ستر وجهه شراه بغالي الاثمان
الا من باعو الشيمه بغالي الروح يشريها
واحب اللي يخاف الله يجيك من العقل رويان
يشير بخير واهل الخير للخيره يدليها
واحب الشهم ممدوح السجايا صافي الوجدان
الا من جوه ضيفانه على نفسه يبديها
واعز اللي يهلي بالضيوف ويشعل النيران
وابي قولة هلا من قلب والعشيات ما ابيها
ابي الدله وابي الفنجال ابي الترحيب بالضيفان
ابي جلسة نشامى راعي المجلس يقهويها
ابي لي سالفة عدله معاها من الشعر قيفان
تشدك حكمة الاجداد يشدك صوت راويها
ابي النخوه وابي الفزعه واحب مجالس الشجعان
هل العادات والفزعات نِعم لا حل طاريها
هل الشيمه هل القيمه هل المعروف والاحسان
هل التقدير والتأثير واللي بيض اياديها
واحب اللي ليا جوه النشامى يفتح البيبان
كريمٍ من قديم الوقت ليا صكت لياليها
احب المرجله واصحابها واقدر الفرسان
بخيصٍ في معانيها قبل لبحث خوافيها
واعرف اللي يخوض المعركه لا صار بالميدان
يمشيها على رايه وياخذها ويعطيها
واحب اللي سوالفهم ذهب موزون بالميزان
موهو خبلٍ يخم السالفة بعدين يخطي
واحب اللي رفع نفسه وجنبه مجلس الحقران
حشيمٍ ما لقى حشمه تركها ما يدانيها
عرف نفسه لزم حده ولا هاين ولا ينهان
الى من زادت اللجه يجنب عن بلاويها
واحب من الرجال اللي يسمى شمعة الديوان
الا منه تحدث كل كلماته ينقيها
ولا احب اللئيم اللي تصيد زلةٍ بلسان
الى منه سمع زلة رفيقه ما يغطيها
واحب اللي ليا سوى غلط قال العفو غلطان
حلاة الرجل لا منه جرح روحن يداويها
ترى اللي يشد في رايه على طول المدى خسران
يضيع ولا يطيع ولا بغاها ما يلاقيها
الخميس أكتوبر 15, 2009 2:28 pm
